1. Outlast-ın whistleblower dlc-sinin baş qəhrəmanı.
Ailəlidir və 2 uşağı var. Uzun müddət işsiz qaldıqdan sonra murkoff şirkətinin idarə etdiyi mount massive dəlixanasında kompyuter mühəndisi (böyük ehtimalla) olaraq işə düzəlir. Ailə yeni işdən ümidlidir və həyatlarının nizama düşəcəyinə, borclarını rahat ödəyə biləcəklərinə inanırlar.
Park, mount massive-də işə başladıqdan bir müddət sonra burada bəzi şeylərin qaydasında getmədiyinin fərqinə varır və narahat olmağa başlayır. Günlərin birində, aralarında oyunun əsas baş qəhrəmanı miles upshur-ın da olduğu bir neçə jurnalistə elektron məktub atır. Onlara burada nələrinsə qaydasında getmədiyindən və kimlərinsə gəlib bunları mütləq çəkməli olduğundan söz açır. Bundan sonra park, sistemdə yaranmış bir problemi düzəltməsi üçün əsas oyunun sonunda görünən laboratoriyaya çağırılır. işini görərkən, oyunun sonrakı hissələrində də görünəcək eddie gluskin adlı bir dəli, əsgərlərin əlindən qaçır və park-dan kömək istəyir. Ancaq park-ın edə biləcəyi bir şey yoxdur və əsgərlər gluskin-i aparır. işini bitirdikdən sonra otağına qayıdan park-ı, müdürü jeremy blaire qarşılayır. Şirkət internetə nəzarət etdiyi üçün park-ın göndərdiyi məktub da gözdən qaçmayıb. Park döyülür və zorla digər dəlilərlə eyni testlərə salınır.
Park gözlərini açdıqda, dəlixanada xaos başladığını görür. Üsyan qaldıran xəstələr, alim və mühafizəçiləri öldürməyə başlayır. Xəstələrdən biri park-a çıxmağa kömək edir. Otaqdakı kameranı götürən park, yola çıxır. indi onun hədəfi burada baş verənləri çəkib sübut yığmaq və çıxdıqdan sonra internetə yükləyib, murkoff-un iç üzünü göstərməkdir.
Park havalandırmada ikən sağ qalmış 2 mühafizəçinin söhbətinə şahid olur. Mühafizəçilər radio qülləsinin hələ də işləyə biləcəyini deyir və kömək çağırmaq üçün oraya yollanırlar. Park da oraya gedir və yolda bir çox maneə ilə qarşılaşır. Adamyeyən bir dəli tərəfindən diri-diri yandırılıb yeyilməkdən xilas olur. Yolda əsas oyundakı əkizlərlə qarşılaşır (bir neçə saniyə görünürlər). Nəhayət, radio qülləsinə gəlib çatır. Ancaq kömək çağırmaq istəyərkən arxadan blaire gəlir və radio cihazını qırır. Park-ı vurur və ona “bacarmadın! Ağzını bağlı tuta bilmədin! Hamımızı zibilə saldın!” deyib, boğmağa çalışır. Bu əsnada uzaqdan qorxunc bir səs gəlir. Blaire, park-a “mənə bir yaxşılıq et və burada öl” deyib qaçır. Gələn şəxs isə əsas oyunun məşhur antoqonisti chris walker-dir. Park, chris-dən qaçır və yolüstü keşiş martin ilə də qarşılaşır. Chris-dən ikinci dəfə qaçır və çölə çıxır.
Çöldə yenə bir çox maneəni keçir və hündür bir yerə çıxır. Ancaq qarşıya tullanmağa çalışarkən ayağı sürüşür və yenə qapalı bir məkana düşür. Burada qarşılaşdığı bir dəli park-a xəbərdarlıq edir: “ehtiyatlı olmalısan! Bizi tutsalar, aşağıdakı adama verəcəklər”. Park yoluna davam edir və naməlum adamlardan qaçdıqdan sonra aşağıya düşür. Naməlum adamlar “özü-özünü təslim etdi. Gəlininiz hazırdır, cənab gluskin” kimi şeylər deyir. Heç nə anlamayan park yoluna davam edərkən, qəfildən gluskin ilə qarşılaşır. Gluskin “bağışla əzizim, səni qorxutdum” deyir. Yol boyu eddie-nin dilindən onun hekayəsi eşidilir. Eddie uşaq ikən, anası ona “bir gün bir insanda əsl sevgini tapacaqsan və çox xoşbəxt olacaqsan” deyərdi. Eddie də evlənə biləcəyi birini axtarmaqda imiş. Park qaçarkən bir ayağını qırır. Gizlənərkən, eddie onu tapır və keyidir. Park 12 saat sonra gözünü açır. Bu 12 saat ərzində jurnalist miles upshur da dəlixananın kişi bölməsinə gəlib çatır və əsas hekayə başlayır.
Park oyandıqda, eddie-nin nələr etdiyinə şahid olur. Gluskin, qaçırdığı xəstələri özünə bir qadın, yoldaş etmək və ondan uşaq dünyaya gətirmək üçün onların cinsi orqanlarını kəsir və öldürür. Bunu edərkən də “bağışla, əzizim. Sevgi hər kəsə uyğun deyil.” deyir. Növbə park-a gəlib çatır. Gluskin ona “doğum, ağır bir prosesdir. Sadəcə gözlərini yum və uşaqlarımızı düşün” deyir. Bu əsnada bir xəstə gluskin-ə hücum edir və park xilas olur. Qaçarkən, içində bir gəlinliyin də olduğu nikah otağına gəlib çatır və buradan dəlixananın kişilər şöbəsinin açarını götürür. Gluskin park-ı bu dəfə də tutur və onu münasibətinin alınmadığı digər “qadınlar” kimi asmağa aparır. Ancaq park onu öldürür və xilas olur. Yol gedərkən uzaqdan əsas hekayədə keşiş martinin yandırıldığı kilsəni görür və qeydlərində “yaxınlıqda kilsə olduğunu bilmirdim” yazır. irəlilədikcə, murkoff əsgərlərinin sağ qalanları öldürmək və hadisələri ört-basdır etmək üçün gəldiyini görür. richard trager-in cəsədi ilə qarşılaşır. Çıxış qapısında blaire-i yaralı vəziyyətdə görür. Blaire, ondan kömək istəyir. Park yaxınlaşdıqda isə gizlətdiyi bıçaqla onu yaralayır və “heç kim burada olanları bilməyəcək!” deyir. Bu əsnada, walrider gəlir və blaire-i öldürür. Park, miles-ın maşınına minir. Walrider-i yenidən görür və onu bir neçə saniyəlik çəkdikdən sonra oradan qaçır.
Bütün bu hadisələrdən sonra, park, çəkdiyi görüntüləri internetə yükləməyə hazırlaşır. Yanında keçmiş bir murkoff əməkdaşı da var. Həmin adam ona bu yolun çox riskli olduğunu, murkoff-un ona və ailəsinə rahat verməyəcəyini deyir. Ancaq park qərarlıdır. Görüntüləri internetə yükləyir və noutbuku bağlaması ilə ekran da qaralır.
Qeyd: əsas hekayənin girişində miles upshur maşından düşməzdən əvvəl bir sənədə göz gəzdirir. Həmin sənəd isə əsas hekayədə kimliyi bilinməyən park-ın yazdığı məktubdur. Oyun və dlc hadisələri, demək olar ki, eyni vaxtda baş verir. Miles oyun boyu dəlixananın kişi, park isə qadın bölməsində olur və heç qarşılaşmırlar.